Beg Ferati ftohet nga Zvicra
Ferati në fillim të korrikut i është bashkuar Freiburgut. Deri në këtë verë ka luajtur për Baselin, me të cilën skuadër fitoi shumë trofe në Zvicër. Në ndeshjen e parë zyrtare me fanellën e Baselit, Ferati shkaktoi penallti tre minuta para fundit dhe ndikoi që skuadra e tij të eliminohej në rrethin e parë të Kupës së Gjermanisë nga Unterhachingu i kategorisë së tretë.
Ferati në Zvicër vlerësohej ndër mbrojtësit më të mirë të qendrës dhe ka disa muaj që ishte në konkurrencë për t'u ftuar në Përfaqësuesen e Zvicrës. Ai për U-21 të Zvicrës ka luajtur 17 herë, ndërsa ka shënuar edhe një gol. Ka luajtur edhe për grupmoshat më të reja.
Afrimi i Feratit në përfaqësuese rrit numrin e futbollistëve shqiptarë te Zvicra. Në ndeshjen e kaluar për Zvicrën ishin ftuar pesë shqiptarë, ndërsa kundër Lihtenshtajnit janë ftuar katër. Përveç Feratit, ftesë kanë marrë edhe Blerim Xhemajli, Xherdan Shaqiri e Admir Mehmedi. Xhemajli ka 13 paraqitje, Shaqiri 11 paraqitje e një gol, ndërsa Mehmedi vetëm një paraqitje. Në ndeshjen e kaluar kundër Anglisë ishin ftuar edhe Granit Xhaka që tani është i lënduar dhe Valon Behrami, të cilin Hitzfeld ka vendosur ta pushojë. Pranë përfaqësueses llogaritet të jetë edhe Albert Bunjaku që ende nuk e ka sanuar plotësisht një lëndim që e mbajti muaj të tërë jashtë fushës së blertë. Ai luajti me Zvicrën në Botërorin 2010, bashkë me Behramin e Shaqirin.
Posted by Faqja Informative Shqiptare
on 2:02 e paradites. Filed under